ДАСЛЕДАВАННЕ Ў МОДУЛІ СУМАВАЛЬНЫХ МАТРЫЧНЫХ ПАСЛЯДОЎНАСЦЕЙ МАТРЫЧНАГА РОЗНАСНАГА ГІПЕРГЕАМЕТРЫЧНАГА РАЎНАННЯ Ў ЗВЫРОДНЫМ ВЫПАДКУ

Abstract

Артыкул прысвечаны даследаванню ўмоў развязальнасці матрычнага рознаснага гіпергеаметрычнага раўнання ў модулі сумавальных матрычных паслядоўнасцей у звыродным выпадку. Сцісла апісваецца структура банахава модуля матрычных сумавальных паслядоўнасцей, прыводзіцца паняцце матрычнага сімвала Пахгамера і адпаведна матрычнай гіпергеаметрычнай паслядоўнасці. Разглядаецца некалькі выпадкаў звыроднасці матрычнага рознаснага гіпергеаметрычнага раўнання. У першым выпадку прыводзяцца ўмовы развязальнасці азначанага раўнання ў модулі сумавальных матрычных паслядоўнасцей і адпаведны выгляд развязка, калі ўсе ўласныя значэнні адной з матрыц, што ўваходзяць у каэфіцыенты раўнання, з’яўляюцца недадатнымі цэлымі лікамі. У другім, больш складаным, выпадку разглядаецца сітуацыя, калі частка ўласных значэнняў азначанай матрыцы не належыць да мноства цэлых недадатных лікаў, а астатнія ўласныя значэнні з’яўляюцца недадатнымі цэлымі лікамі. Прыводзіцца выгляд развязка ў дадзеным выпадку і ўмова яго прыналежнасці да модуля сумавальных матрычных паслядоўнасцей. Даследаванне грунтуецца на выкарыстанні аперацыйнага метаду, адмысловых замен зменных, выкарыстанні вынікаў, атрыманых пры развязанні рознаснага матрычнага гіпергеаметрычнага раўнання ў незвыродным выпадку ў модулі сумавальных матрычных паслядоўнасцей.