Шэрагі Фур’е

Abstract

Трыганаметрычныя шэрагі шырока выкарыстоўваюцца ў разнастайных пытаннях матэматычнай фізікі, у прыватнасці, у электратэхніцы, радыётэхніцы, тэорыі пругкіх ваганняў, метэаралогіі і г.д. Часцей усяго яны ўжываюцца пры вывучэнні перыядычных працэсаў. На практыцы часта даводзіцца раскладаць у шэраг Фур’е функцыі, якія атрымліваюцца ў выніку эксперыменту або назіранняў. Вялікае і тэарэтычнае значэнне трыганаметрычных шэрагаў. У той час, калі ў ступеневыя шэрагі раскладаюцца нават не ўсе неабмежавана дыферэнцавальныя функцыі, для раскладання ў трыганаметрычны шэраг функцыя не павінна задавальняць настолькі цяжкім умовам. Таму трыганаметрычныя шэрагі з’яўляюцца зручным інструментам для даследавання шырокага класа функцый. Дапаможнік разбіты на параграфы. Нумарацыя формул захоўваецца ў межах кожнага з іх. У пачатку параграфа прыводзіцца тэарэтычны матэрыял; затым падрабязна разбіраюцца тыпавыя прыклады; пасля гэтага даюцца практыкаванні для самастойнага рашэння. Амаль усе практыкаванні забяспечаны адказамі.