САСТАЎ ФРАЗЕАСЕМАНТЫЧНАГА ПОЛЯ «ФІЗІЧНЫ СТАН ЧАЛАВЕКА» Ў БЕЛАРУСКАЙ ЛІТАРАТУРНАЙ МОВЕ

Abstract

Артыкул прысвечаны праблеме структуравання фразеалагічнага матэрыялу з пункту гледжання фразеасемантычнага поля, якое ўяўляе сабой арганізаваную сістэму, дзе існуюць упарадкаваныя іерархічныя адносіны паміж падсістэмамі, а кампаненты характарызуюцца агульным семантычным кампанентам ‘фізічны стан чалавека’. Дэнататыўная сфера фізічнага стану чалавека акрэсліваецца жыццядзейнасцю арганізма і яго частак: фразеалагізмы адлюстроўваюць здароўе, хваробу, ап’яненне, цяжарнасць, голад, смагу, сыць, сон, праяўленне тэмпературнай рэцэпцыі, аблічча, целасклад, рост, скананне чалавека. Адпаведна, вылучаны фразеасемантычныя субпалі: «агульнае самаадчуванне», «рэакцыя арганізма на пэўную сітуацыю», «фізіялагічны стан», «знешні выгляд як вынік фізічнага стану» і «лятальны стан». Яны ўключаюць у свой склад фразеасемантычныя мікрапалі, якія маюць разгалінаваную семантычную структуру і распадаюцца на фразеасемантычныя групы.